買樓好仔女最好睇睇以下篇文章

週末和朋友聚會，聽到一個故事，和營運人生的課題有關，可以和大家分享一下。有個朋友的朋友是律師，人到中年，事業有成，身家不薄，本已享受快樂人生，佢有三個仔，全部送哂去外國讀書，在96年後逐一回港，而家父母好多係直升機父母，仔女一有事，或者疑似有事，阿爸阿媽就如雷霆救兵咁坐直升機空降，大叫有乜可以幫手? 總之好似燈神一樣，幫仔女解決所有問題。 呢位律師先生也不例外，佢自己做唔少樓契生意，在96、97年睇住樓價急升，當時見個大仔回港做，雖然都叫做行政人員見習生，但搵萬零銀一個月，唔知點樣買樓，就在97年幫佢俾三成首期，幫佢在港島買間300、400萬的中小型單位，讓個仔無痛上車。上車時有老豆俾錢，的確係無痛，但97年10月開始樓價開始暴跌，就有痛啦。個大仔開始覺得，老豆無端送舊負資產俾佢。 到99年香港樓價開始較大反彈，律師先生個二仔返香港，科網熱潮爆發，樓價起勢升，好了傷疤忘了痛，直升機爸爸又覺得二仔而家唔買樓呢一世都買唔到樓啦，所以又出資過100萬，幫二仔在港島區置業。由於那時樓價比97年低，同一筆錢，二仔買間樓大，大仔有唔高興。 2000年科網熱潮爆破，樓價開始跌，到2003年爆沙士，樓價更跌入谷底，大仔間樓唔見5成以上，二仔間樓都唔見3成，兩個乖仔開始當老豆係仇人，話老豆累佢一身債，如果唔係間樓，佢地花錢去玩樂旅行都不知幾輕鬆，而家花多錢都唔敢，而且如果早唔入市等03年才入市，可以買大一倍，仲係新樓。父子關係開始轉差，兩個仔都唔係幾想同老豆見面食飯。 到今天樓價大升，父子關係應該有改善? 好奇怪，關係差好似好難好番一樣，大家習慣少見面，始終都係少見面，而且兩個仔工作愈來愈忙，更多藉口唔見老豆。如今問題又來了，第三個仔剛好去年畢業回港，見報紙日日買港人買唔起樓，好似而家唔買一世都買唔到咁款，又想問老豆錢俾首期買樓，老豆十分苦惱，俾100、200萬佢唔係俾唔起，但而家樓價咁貴，買完會唔會重演大仔、二仔的慘劇呢? 如果唔俾，細仔又會覺得好唔公平，點解老豆幫大哥二哥買樓，又唔幫我買呢? 假如你是律師先生，又會點做呢? 香港人買樓好怪，樓市愈跌，樓價愈平，無人想買樓，怕買再跌，但到樓價升到飛起時，就覺得唔買唔得，今日唔買一世都無機會買，要逼政府幫自己買樓。政府逼唔到時，就逼老豆老母幫手。 聽到律師先生的故事，覺得幾心酸，想幫忙，結果還幫出怨恨。人生要自己去營運，如果老豆老母幫得愈多，孩子自己營運人生的能力會愈來愈少。假如97年律師先生無幫大仔買樓，佢可能買唔到，或者過幾年才買好彩買平三幾成都講唔定。又或者佢唔知點解當時都借到錢去買，一樣買貴樓，但由於呢個係佢自己作的決定，無得怨人，只能咬實牙關去頂，而且一次摸頂買貴，佢買教訓，以後人都會學精，唔係好似而家咁，經常掛在口邊:「最衰我老豆97年叫我買樓……」

非常同意。