根據金管局最新9月按揭統計數字顯示，反映業主供款質素指標之一的按揭拖欠比率正處於歷史偏低水平，當中拖欠逾三個月及拖欠逾六個月的比率，分別只有0.2%及0.1%，....................
在上述供樓脫期個案加埋有0.3%中，我推算現在有仟多名業主供唔掂樓！
喺呢個低息環境中，今時今日按息 2.5 厘最高啦，根據港人業主良好傳統，就算去乞、去借、去食 2 手飯，都死埋條數去供樓，咁那些連樓按都圍唔倒數嘅人，仲唔係失業、生重病、離婚、生意失敗嘅人？---總之唔慌係喜事啦！
你政府呢個打房政策，擺到明針對擁有多一套房嘅人仕，咁那些實力不足又持貨過重嘅炒家或投資者，如果還有少少政經常識，仲唔神早雞飛狗跳，痾乾痾淨，乜貨都走清？
喺低息環境下，持貨者還樓貸根本易如反掌，而 3 D令到成交冰封，在交投大減，買賣兩閒的情況下，那些仲要急放磚頭救命者，仲唔係急到瀨嘅待宰羔羊？咁唔俾人壓價壓到你扁，真係阿奇生阿奇！
地代老闆亂開舖，攪到地代成街都係，現在被市場小懲大戒，要汰弱留強，好多塘邊鶴喺度講風涼話，拒哋抵死！
但嗰仟幾個脫期者，請問聲 CY，有多少個係真係抵死嘅炒家先？？
現在政府呢槓打房緊箍咒，就是專向那些弱勢無助、遭遇不幸又無路可走嘅小業主傷口灑鹽，仲要係執完一劑又一劑！
現在呢個老千局，地產發展商因為來貨價平，可使出狂龍十八招清貨，就算點扣點減，還有大把利潤喺手，但被迫在呢段時間賣樓者，唔少人已經或將要入肉，俾人屈機！
呢啲仲唔係劫貧濟富嘅惡法？
惨绝人寰、顛倒是非、莫此為甚！！
