美聯最新樓價指數大約係 6,800 一呎，理論上一個核心三人家庭，要住在實用五百呎嘅樓宇方叫合理，即建築面積計要六百呎咁上下，換句話說無４百個唔好講嘢！
面對咁鬼高嘅樓價，街坊樓市評論員就話要打房，打到你樓價去到合理水平為止！咁呢班街坊所謂「合理水平」究竟係乜水位？
香港家庭收入中位數係兩萬多，當用收入四成供樓，做九成按揭(已經唔同你計按保)分 25年供，按息計 2.5厘，最盡只可負擔兩百萬樓下嘅樓宇，即施永青話樓價要跌一半先攪得掂！
兩百個嘅樓要六百呎，即每呎只售 3,333元，扣除弍仟幾建築成本，即每呎地一千銀都無，這連土地開發嘅成本都攞唔翻！請問邊個埋單先！！
世界無免費午餐呢回事，請人食一鑊半鑊無問題，長期咁攪肯定爆煲！
申請居屋家庭入息上限如果是４萬，佔全港家庭七成多達此標準！
當然這些家庭唔少已經住喺公屋或其他資助房屋裏面，仲有啲擁有埋自住私樓添，但無殼蝸牛達此標準者，都有弍叁拾萬，這實在是一條重擔！
其實現在政府應以港人居住需要行先，例如青衣置安心就應該實行原價七折，但當打後賣出單位之時，只能原價售于房協，而此類單位只係自住，不能出租及轉名，連仔女都唔得，咁就可首先解決那部份只求安居人仕需要，至於那些又想自住，又想投資嘅人，基於僧多粥少關係，唯有等下一個樓市循環先攪。
