呢幾日香港美匯多次接近强方保證 7.75，加埋人仔升破 8算，面對香港水浸及大陸市民可折上折買樓，後市飈升可期， CY俾人狂炳之情況短期難以改變！
自美國取消了昔日的金本位制度之後，世界各地貨幣政策變得泛政治化，經濟好之時要印銀紙買選票，增加貨幣供應量！
而經濟唔好之時更加要印多啲，以刺激一下經濟，否則現政府鐵定無得留低！
咁手執印鈔權嘅人咪可為所欲為？殘民自肥？
西方民主社會講求制度及制衡，所以拒哋就整鬼整馬，攪啲「錨」出來！
金同銀做過錨，但因經濟高速發展，金銀供需追唔上而取消左！
現在西方央行大多以物價及經濟指數做錨，本來合理得多，但咁樣做亦有盲點，一來呢啲係濟後數据，仲要成日背馳咁先衰。
而且好多時候，貨幣供應更淪為政客選舉工程嘅一部份，攪到財政赤字預算及國債佔 GDP 100 % 者司空見慣！
自2002年以來，美國政府債務額快速增長，債務上限上調了10次，數值擴大了2.2倍。2011年5月16日，美國國債再次觸頂達到14.29萬億美元上限。同年8月2日，美國國會對政府債務上限上調了2.1萬億美元，以避免危機發生。2007年9月份以來，美國國債以每天38.9億美元的增速增長至今。據國債鐘顯示，截至2012年8月25日，美國國債總額高達15.98萬億美元，已超出其GDP總額，人均負債5.09萬美元。
香港係一個高度自由化嘅經濟城市，資金進出幾乎無皇管或管拒唔倒，上百億資金在高速互聯網中出入，彈指之間就發生左！
所以港元絕對唔能夠做無尾飛砣，否則香港就會成為提款機，隨時俾大鱷提錢提到你破產！
歐美呢兩個生銹錨，長遠同拒哋掛，死路一條！
但唔同拒哋掛呢，係中短期來講，仲衰多二錢重！！
自由市場的運作就要讓價格自由浮動，香港係呢個環境之下吃盡甜頭 / 苦頭！
人民幣喺十年內應不能成為國際性流通貨幣，但如果有一日港元同人民幣掛勾, 咁港元比對美元就愈來愈強，那麼港人持有美元結算保險單及基金點算？美元計價就愈來愈跌，呢啲金融產品嘅現金值會貶，賠償又少左，價值反覆尋底。
港元資產(如樓同股票)對外國來講，就愈來愈貴, 樓市同股市都會下跌.
港元強一方面入口平. 物價會下調. 但影響出口及旅遊業，只係零和關係。
香港財金官員，現在處係一個死局當中，所能做嘅嘢唔多，唯有金融系統安全擺優先，市民有屋住其後，所以無殼蝸牛會被犧牲，上私樓唔該等一等！
香港嘅經濟規模相對世界而言，滄海一粟，如果自己攪你嘅自由浮動，分分鐘一鑊泡收場，我就唔相信金管局有人拍心口話拒拆倒呢個局！！
呢個世界嘅午餐並無免費過，睇吓最後邊個埋單啫！
但我個人意見，港元有如賭場籌碼，兌換率愈容易明白愈好！！
基於鈎脫唔倒，美國及歐洲又係咁變相印銀紙保經濟，港人點樣自處，請各自盤算，自求多福。
住公屋嘅低下階層---你哋淡定，大把民生派議員會同你們做嘢。
有私人樓自住嘅業主---千萬唔好傻吓傻吓聽人老點賣自住樓。
有兩層私人樓嘅業主---你們是政府現在重點打擊對象，千萬唔好賣樓，因為賣左好難買得翻。
有叁層私人樓以上嘅業主---同揸兩間嘅業主情況相同，但要考慮自己財務結構，賣走一些唔係咁優質嘅物業，優化個人資產負債表可以考慮。
住私人樓嘅租客---你哋應該有如熱鍋上的螞蟻，首先睇吓有無四成首期，份工穩唔穩定，供係咪平過租，再計吓加息三厘會否供款超過入息四成，上述任何一樣未能達標者，千萬唔好入市。
同老豆老母住緊嘅年青人---世上只有爸媽好，呢幾年同父母親住埋一齊先，肯定有著數，現在大把議員同你們圍緊 CY，儲定錢一定無錯。
揸住一球美元現金以上者---你們可以將層樓升呢，例如新界換市區、三房轉四房、單幢變屋邨，但拜託唔好再火上加油走去加注買多幾間，由其是中下價樓，否則 CY發脾氣出絕招咁就攞嚟衰。
地產發展商---唔該你哋唔好咁高調好嗎？先賣嗰啲平嘢，再揾 A準每個月清十個八個貴價嘢，條數一樣咋！
最後講多句，呢次以你生蟲機最衰，你個盤係同港鐵合作嘅，請問咁摶為左乜？
食到個價咁盡，下一個地盆、下一單補地價，政府同港鐵要價會幾多你們想過未？
唔通賣埋屯門呢個盤就可以食過世？唔使做？
