民主派今次大敗，是因為在競選期間大家鬼打鬼，互相鬥激鬥罵鬥數臭，這不但蠶食香港民主根基，若果這種選舉文化發展下去，將令以後選舉淪為仇恨宣泄窗口，泛民各派為求上位，齊齊玩撥糞整走同路人，咁嗰啲中間務實理智嘅泛民支持者還會出來撑你、俾票你嗎？而選後泛民各派政黨也因彼此裂痕太深而難以合作，27席立法會籌碼，唔係好穩陣咋！
以民建聯和工聯會為首的建制派，在這次成功示範出超級選舉機器的威力，仲衝破埋六四黃金定律，如果不是國教科爭議推高投票率約8個百分點，泛民的得票率可能會由五成半跌至僅僅五成，泛民隨時連 24 席都保唔倒。
2011年建制派在區議會以狂風掃落葉之勢，大敗民主黨派，乃示警訊號，建制派經年經營，已成功於港九新界各區安插大量樁腳，加上源源不斷嘅人力物力大面積投放，所以今次可以將喺地區默默耕耘嘅民主黨及民協打到不成人型，仲幾乎喺新界將民主黨嘅根據地一鋪清袋咁濟，咁以後立法會選舉嘅形勢好清楚，只要建制派嘅選舉機器穩定發揮，就可持續奪得五成左右選票，再憑較佳的配票效率，就可以拿到超過五成的議席，令泛民在直選中也成為永恆少數派。
而建制派今後發展，肯定是以民建聯作主軸，以爭取中間務實理智嘅選民。
然後讓出左翼俾工聯會，招呼勞動階級。
再整合葉劉淑儀、田二少、梁美芬、謝偉俊以及自由黨等工商界人仕，以爭中間偏右者支持，即廣大小業主為目標，為加強他們之實力，今屆高票落選嘅方國珊、陳國強及龐愛蘭應是重點招攬對像。要人有人、要錢有錢、要票有票，有志從政者仲唔知所進退？
四年八年後片直選立法會！怕你有牙？
