茶餐廳日誌（265）咖啡或茶

　　今早毛毛雨，天氣又凍，本來唔想跑步，但一早起了床睇波，阿仙奴又輸，有MK都唔掂，雲加都幾頭痛，不過，頭痛又何至雲加一人，美股在升浪中兩連跌，而今早還是大跌262點，對於那些話股市在牛二或者牛三的人來說，的確是一個打擊，掙扎了一陣，最終都有去跑步，跑完之後去到茶餐廳，見到有物業代理對老闆說，今次想窮都難，那些玩開投資的人，在過去買股票或者買樓，好似茶餐廳的早餐一樣，可以揀咖啡或茶，如果沒有咖啡供應，食早餐的人一定要揀茶，股市死火，投資者迫住要買樓，所以樓價必升，叫老闆有買趁手，老闆都覺得幾有道理，所以沒有反駁。

　　老闆問實況是不是如此，真的很難確定，不過，股市升的確會帶動樓價升，因為有些買家見業主企硬高價，將打算落訂的現金用作買股，誰不知有一些股票在一個月內升了超過三成，他們又可以滿足業主要求，故此，股價升的確可以帶動樓價升，但股市下跌，是否會令打算買股票的人轉移買樓，我不敢說沒有，但數量應該不至於帶動樓市上升，但大家都要明白，從事地產行業的人一定會睇好樓市，現在發展到出現任何情況，樓市都必然上升，我早已不敢反駁，老闆亦啞口無言。