茶餐廳亂話（76）怎樣才算是尊重市場

　　昨晚，茶餐廳老闆話有漁檔朋友送來兩條游水方脷，請我去品嚐，我話多謝，但容許我帶一枝21年麥加崙威士忌，在飲酒吹水期間，我發覺晚餐的餐牌很舊，於是問老闆，晚餐有幾耐沒有加價，佢話有五年，晚上生意不多，沒有條件加價，我突然覺得，老闆這樣做，可以直接解釋什麼是尊重市場，如果生意甚佳，當然可以加價，就算生意唔好老闆仍然有權加價，但就不能夠說是尊重市場。

　　老施轉軚，對物業市場由睇跌轉為大升，理由是尊重市場，我覺得老施轉軚可以，但不能夠以尊重市場為理由，除非，現在樓市大旺，價量俱升，而事實上樓市在二手樓巿場極其缺盤情況下上升，只能說是量少價升的市場，沒有成交量的市場成交價不會被尊重，因為成交量增加，成交價可能會下跌，唔通到時再轉軚，話晒都是物業代理界泰山北斗，很多人偶像，經常轉軚會被人講閒話，在閒談之間，我發覺茶餐廳不但晚餐沒有加價，早午餐也沒有加，我問老闆，茶餐廳早午餐都非常爆棚，點解唔加價，老闆話平均有錢賺就可以，如果加價後生意唔好，又要轉回舊價，好似現正有一些新樓盤一樣，見大家唱好樓市，立刻加價，但加價後銷售不理想，很難立刻減價，況且茶餐廳是以薄利多銷，自己舖，街坊生意，唔好成日加加減減，唔知點解，我突然間覺得老闆深藏不露，好彩唔係對手，否則都幾難應付。