心甘情願被擺上枱的王維基

　　亞視賣盤，雖然撲朔迷離，但發展迅速，大家還未搞清來龍去脈時，政府已經開記者招待會，表明不會續牌俾亞視。而在較早之前，亞視主要投資者王征話魔童王維基曾經與佢接觸，商談賣盤事宜，連亞視的新聞亦有播放，令人覺得王維基真的有意購買亞視，雖然，王維基的港視亦發聲明否認，但反而令人覺得是此地無銀三百両，話冇即是有。
 
　　事實證明亞視是有一個出價很低的買家，而王征出聲話曾與王維基洽談，其實是擺王維基上枱，迫那位買家出價高一些，雖然，亞視強人葉家寶否認，但亦只不過是欲蓋彌彰，其實，葉家寶又不用擔心，就算承認都冇所謂，王維基是甘心情願被擺上枱。王維基當然希望買起亞視，當日，他在亞視做過12日CEO，鬱鬱不得志離開，現在買亞視心態就是從那裡跌低，便從那裡站起來。但很可惜，王維基搞港視已經用了十多億，買亞視或者無能為力，就算王維基買到亞視，九成都過唔到政府果關，倒不如享受被人擺上抬，做吓A貨買家都唔錯。

　　政府用五位官員開記招，用成個鐘頭講了一大堆廢話解釋，之後，都是決定唔與亞視續牌，其實毋需這樣大陣像，新聞處發表一段聲明便可以，講多錯多這個道理都唔明白。大家又唔好以為那些亞視股東好心傷，其實，政府不續牌是幫了他們，連糧都冇得出，倒不如早早結業，來一個大解脫還好。

　　我覺得今次亞視用錯戰術，擺任何人上枱都得，但一定唔能夠擺魔童上抬，王征，葉家寶都應該知道政府最忌的是王維基，如果擺其他人上枱，政府仲可以等，或者可以接受，擺王維基，就等都唔使等，這是基本常識，冇理由亞視的揸fit人唔知道，除非，他們有意結業，而且是政府不續牌而令到亞視結業，並非他們經營不善，非戰之罪。今次王維基真的是冷手執個熱煎堆，除了享受做A貨買家外，港視股價又升咗一成，冇咗亞視，他日政府會再招標，港視亦有機會，最少名義上有機會。至於有意買亞視那位人兄，唔買好過買，因為，王征擺王維基上枱，要價一定唔會平，而他又可以在短時間內簽訂協議書，一定將收購價提高了不少，現在政府不續牌，其實是幫了他一個大忙，收購亞視，公子哥兒的玩意而已，做生意的人唔會考慮。