茶餐廳手記（#1143）最不受歡迎的賭法

　　今日早上去到茶餐廳，有客人話週末去了澳門，入埋賭場，冇乜輸贏，不過就發覺一件事，百家樂賭枱很多，21點賭枱很少，是不是賭場見21點賭枱輸錢，就大幅削減賭枱數目，賭場咁樣做太小家。

　　老闆話，21點賭枱減少，因為21點不受歡迎，並不是賭場小家，如果賭百家樂，派完兩隻牌，如果同點數，莊閒打和，閒家唔使輸，但如果賭21點，莊閒都爆煲，但閒先爆先輸，就算莊爆都是贏家，但賭仔又唔可以做莊，整整吓，就冇人賭21點。

　　其實，玩股票也是一樣，上星期五，台股大跌近1900點，到了星期一，台股大升超過1900點，兩日比對，仲升了些少，接住兩日，仲多過2000點，有人話有驚無險，其實睇吓點樣玩法，如果用孖展買股，可能已經被迫倉，在星期五已經迫炒家將股票賣走，以後大升都冇他們的份，但如果是全資買股，星期一大升，他們才可以收復失地，之後仲繼續贏錢，所以，炒股票，講贏輸，都要睇吓用邊種玩法，如果借孖展炒股，股市下跌就好似21點閒家爆煲，已經被人斬倉，就算倒升都冇他們的份，試過幾次，就唔夠膽借孖展炒股，就算借都唔敢借咁盡。