茶餐廳手記（#1082）投資者是曹操，銀行家是關羽

　　今日早上去到茶餐廳，聽到客人講打仗，一場赤壁之戰，一場淝水之戰，兩場都是百萬大軍由北方南下，最後都是被擊敗收場，但點解曹操可以保存實力，東山再起，最後滅了東漢，而苻堅則一蹶不振，被盟友離棄，前秦最後滅亡，而事實上苻堅的兵力更盛，兼對手更弱。

　　老闆話，如果要講，一日一夜都講唔哂，雙方在戰前都意氣風發，曹操在赤壁橫槊賦詩，苻堅則投鞭斷流，及後兵敗，苻堅逃走時覺得風聲鶴淚，草木皆兵，所有兵力一鋪輸哂，翻身無望，而曹操則在唔同時段，派出許禇，張遼，徐晃等大將堵截趙子龍，甘寧，張飛等追兵，最後逃回北方，重整旗鼓，魏蜀吳三國才可以出現。

　　香港樓市亦出現赤壁，淝水之戰情況，在樓價未下跌時，投資者都意氣風發，商業樓價屢創新高，在疫情之後，商業樓宇需求大幅減少，銀行追差額，雖然有少數投資者躺平，但是大多數都面對現實，採用曹操逃走時方法，在不同時間賣走心頭好的優質物業，以應付銀行追差額，不過，謀事在人 成事在天，即使曹操，最後仍然要在華容道面對關羽，如果不是關雲長義薄雲天，曹操不會有翻身之日，今日投資者也是一樣，雖然已經賣走不少物業，應付了很多call loan，但如果銀行家沒有關雲長的大度，放投資者一馬，相信仍然有不少投資者過唔到今次難關。