茶餐廳手記（#991）大淡友唱好可能是被迫的

　　今日早上去到茶餐廳，聽到有客人話今年樓市應該翻生，除了各項因素變得有利之外，連一向唱淡，話樓市好似一個深淵的大淡友都改為睇好樓市，認為樓市有5%升幅，雖然升幅輕微，但大淡友改變對樓市睇法就值得大家重視。

　　老闆話，各項對樓市的因素的確變得有利，但大淡友唱好可能並非那些因素，大淡友唱淡樓市的目的，就是希望銀行call loan，實力不夠的業主被迫賣樓，目的是可以多做生意，而事實上大淡友的目的亦達到，不過，又唔見到大淡友可以多做生意，原因是打算賣樓的業主，如果搵一個睇淡樓市的代理去賣，又點會賣得好價，冇業主叫大淡友賣樓，又點會多做生意。

　　不過，大家又不用替大淡友擔心，那些比大淡友睇得更淡，或者盲目鋤價的買家，就會搵大淡友代表他們出價，業主當然不會接受，最後依然得個吉，做唔到生意，想唔睇好都唔得，雖然有人話大淡友睇好是被迫的，但又唔能夠一概而論，在人口增加，需求增加，供應不足，而香港經濟亦回復增長之下，樓價止跌回升是極之正常，如果在這個情況仍然唱淡，只不過是包拗頸，如果今年樓市有雙位數升幅，大淡友的損失就會很大，不但做唔到生意，而且有損自己的專業尊嚴，現在睇好是最佳轉軚時間，同時亦叫那些打算鋤價買家死了條心。