茶餐廳手記（#847）如果不是關稅，一早已經減息

　　今日早上去到茶餐廳，有客人話特朗普成日埋怨鮑威爾唔減息，鮑威爾終於作出最後反擊，如果不是特朗普推出關稅，一早已經減息，今次唔知特朗普點樣拆。

　　老闆話，鮑威爾可能知道冇得撈，所以都不計後果，將事實講出嚟，美國減息最大條件就是通脹受到控制，本來是很難的事，但鮑威爾都算做到，全世界都等緊美國減息，甚至以為在特朗普上任之後，美國立刻減息，但全世界都跌了眼鏡，特朗普上任之後，可能認為減息太慢，遠水不能救近火，於是對全世界開徵關稅，盡顯王者風範，仲諗到各國要鍚佢屁股要求減關稅，但到了今日，執行關稅日期一再延遲，代表很少國家接受美國關稅，換句話說，特朗普關稅政策失敗，就輪到鮑威爾打落水狗，一句如果不是推出關稅，一早已經減息，搞到特朗普團隊頭都痕。

　　關稅事件，盡顯美國執政者無知，特朗普團隊以為關稅由生產商支付，所以，生產商的國家要排隊錫佢屁股，美國人民反而知道關稅是由入口商支付，視頻顯示有美國人話自己做入口商超過20年，貨物進入美國前，他首先要清關，即是繳付關稅，根本唔關生產商的事，不過，亦不是想像中咁高，尤其是中國的貨物，入口價大約是零售價1/6，就算俾145%關稅，都唔會令美國人唔買中國貨，對歐美日本影響比較大，一部車收25%關稅，賺埋都唔夠俾，不過無論如何，羊毛是出在羊身上，入口商俾了關稅，售價一定要提高，直接令通脹上升，通脹上升，又點可以減息，鮑威爾在適當時候反擊，威力倍增。