租客對市況最敏銳

　　有新同事與租客續租，回到公司對我說，租客話生意很難做，不過，仍然肯依照合約所訂條件續租，並且要求加多三年，我對新同事說，千祈唔好問租客生意好唔好，唔會有租客話生意好，他們一定話生意很難做，就算唔要求減租，都希望業主加租時手輕一點，這是人之常情，其實，他們對市場的觸角是最敏銳的一群人，如果冇得做，他們賠錢取消租約都願意，現在，市面上有很多舖位空置，不少是租客賠錢斷約，所以，租客願意續租，又肯加多三年，一定對後市非常有信心，我對新同事講，他取得非常重要訊息，應記一功。

　　新同事無端端立了功，在大廳口沫橫飛，我覺得係時候給他上一課，於是叫他入房，聽住我打電話給那位租客，問他的生意如何，佢話生意唔錯，有得做，希望我加多三年租約，我話可以考慮，叫他準備一個新方案，新租金由他釐訂，我只會接受抑或不接受，如果接受的話，絕不多加一分錢，如果不接受的話，加多多都不會再接受，租客明白。當日下午，我收到一份非常好續約方案，我接受，租客開心，皆大歡喜，不過，同事唔明白，明明租客話生意難做，點解我同佢講又全部唔同晒，他非常頹喪，我安慰他說，大家地位唔同，租客的表達自不然會唔同，如果負責與租客傾約的同事只能夠有權接受，租客是不會俾到最好的續約條件，如果好似我，有權力唔接受，甚至終止傾談，要租客如期遷出，他們就會給予最好的續約條件，至於點解租客願意接受，這方面業主一定要做多少功夫，令到租客知道，業主對市況亦瞭如指掌，知道冇得偷雞，唯有出一個雙贏的方案，所以，業主就一定要對市況敏銳，才可以與租客打成平手。