細價樓業主的憂慮

　　昨日寫了一篇文章關於在單位內輕生的事，被人插到暈，網站要加班睇住，將不雅的言語delete，因為那些人唔希望我講關於細價樓不利消息，如果我唔講，只有那些人講投資細價樓點好點好，如果加息，就立刻加租，令人有所誤會，在現時環境下買細價樓收租仍然是非常好的投資。我老實說，現在細價樓業主震過貓王，如果不是有SSD鎖住，那些話投資細價樓點好點好的人一定會立刻賣走他們的細價樓，叫人現在買細價樓即是抱著發瘋搵人陪心態，有網友講得好啱，叫他們積吓陰德，如果自住而又有能力，買也無妨，用作投資就千祈唔好。

　　大約六，七年前，有同事提議我用兩億元掃屯門區細價樓，當時的細價樓大多數在二百萬元以下，只需付100元印花稅，成本很輕，我立刻應承，第二日我反口，我對同事說，他的提議非常好，應記一功，但紀惠不會投資影響民生的細價樓，我們唔賺基層市民的金錢，但這不是唯一的一個答案，因為租細價樓住的人已經坎坷，他們未能夠上樓，而每個月支付的租金佔了他們大部份收入，倘若經濟情況轉壞，收入減少甚至失業，他們就沒有能力支付租金，試問做業主的人點算，唔通將他們一家大小趕離那個出租單位，我試問不是一個狠心的人，冇資格做細價樓業主，所以，我唔夠膽買細價樓。

　　一般租霸，都會在細價樓巿場出現，豪宅以及中型住宅很少發生，試問如果租客欠租，細價樓業主有何對策，就算可以趕走一個租霸，成本亦不菲。在經濟尚佳時，業主還可以揀租客，如果經濟放緩，細價樓業主的要求就會降低很多，租霸就會乘虛而入，實在是防不勝防，我知道很多人唔想我講，但我本著良心，明知道會被人攻擊都要講，我夠膽現在叫人唔好買細價樓，但絕對不敢叫人買，但買與不買，全屬個人決定，我只不過講我的意見。