字乃文章衣冠

　　星期六，有老友到公司搵我，見到我以前寫文章的手稿，話我手字唔錯。佢以為我是番書仔，手中文字一定好似打風咁。其實，老友估得冇錯，當年我升上中學，國文科考試，作文的部份不合格，老師評語不是文章內容不好，而是我的字體太差。回到家，平時一向撐我的阿媽那次都唔撐，但佢講左一句說話，字乃文章衣冠，手字唔好，文章寫到識飛都冇用。於是，我每日用半小時練字，終於手字可以見得下人。

　　老友問點解在社運以及疫情下，香港樓市仍然唔跌，不但最新中原指數升了1％，與最高峰時只差幾個百分點。而政府租樓更加離譜，產業處山頂洋房招租，竟然比舊租升了24％，究竟是什麼原因？其實，有一個大家經常掛在口邊，但現在又忽視的原因，就是香港法制完善，令到不少本港人以及國內人夠膽在香港買樓，亦有不少外國人來香港工作及居住。所以，即使在疫情下，樓價與租金都有上升趨勢。換句話說，香港就是一篇文章，法制就是手字。字體靚，大家都有興趣睇文章內容，夠膽投資香港，字乃文章衣冠是冇錯。

　　不過話分兩頭，今日香港的法制似乎有不穩現象。我並不是說中央政府干預香港法律，或者會有人與我的見解不同。我的意思是有法官在判案時不夠中立，對於有一些犯法的人判罰太輕。當然，是否中立，判罰輕重是見仁見智，但問題是當那些案件經律政司發還重判，大多數都會判得重很多，甚至有法官對自己裁決不滿意而自我要求重判。在一個唔識得法律的人來看，究竟香港法律出了什麼問題，同一案件點解有咁大差異的判罰，而被要求重判的法官並沒有提出抗議，法律女神的天秤究竟去了那裏。如果這些事不遏止，久而久之，大家都會對香港的法律失去信心。香港經濟自然會下沉，手字唔靚，文章幾好都冇用。