一樓兩價

　　我去北歐旅行期間，中原城市領先指數連環破頂，施永青轉軚，本來預測今年跌8至10%變成在未來18個月倒升20%，雖然理由頗為牽強，但夠膽在樓市從未下跌便預測調頭回升，一定要有相當心理質素，因為如果唔升反跌，就會被人笑到面黃，不過，樓價上升絕不出奇，因為樓市將出現一樓兩價。

　　有年輕朋友同我講，他的住宅單位升了很多，如果現在賣走，可以幾年唔需要返工，我問他的住宅單位是不是用有限公司持有，如果唔係，他只不過是紙上富貴，事實上很難將單位以高價賣走，年輕朋友話他是香港人，買樓只需要付正常印花稅，如果用有限公司買，要額外多付15%BSD，有冇咁傻，物業代理同佢講真的有高價成交，而且新盤全部加價，唔通仲有假，佢叫我唔好睇樓市睇得咁淡，否則，我會損失搵大錢機會，我話多謝教誨，叫他嘗試將住宅單位出售，睇吓物業代理點樣講。

　　如果有人在三年前買了樓，見到現在樓價，又不用付SSD，隨時會心動將自住單位賣走，不過，當他們放售時，物業代理第一句就會問那個單位是否由有限公司持有，如果話唔係，代理就會話很難做到好價，因為買家是找尋那些用有限公司持有物業，貪最高可以慳30%印花稅，如果不是由有限公司持有，減價兩成或者有機會，現在大家見到的高價成交，大部分的物業都是以有限公司持有，只要將股權轉讓，就可以完成物業買賣交易，不過，大家不能說那些成交價是虛構的，只是不需要付印花稅的成交價，物業代理當然不會講實情，不需要太久，物業市場便會出現一樓兩價，住宅單位如果用有限公司持有的售價會高很多。