最近政府今年第一季報道，在未來三至四年潛在供應量，比去年第四季減少3000個單位，仍然有10.1萬個單位，比正常9.3萬為高，很多人認為，潛在供應量高於正常水平，樓價即使連續上升10個月，但仍然有下行壓力，現在買樓仍然有很大風險。
潛在供應量的確是有作用，但現在報道是不合時宜，大家有睇過「三國演義」，曹操打張繡，搵唔到水源，於是話前面有梅林，士兵聽到之後就生津止渴，最後當然擊敗張繡，但如果曹操軍隊早已搵到水源，曹操講十次前面有梅林都冇用。
潛在供應量在最初推出時，因為土地供應不足而令樓價飆升，於是政府畫了一個大餅，左拼右拼之下話在未來三至
四年有9.3萬個單位潛在供應，包括貨尾單位，興建中未出售單位，甚至連可以興建的單位都計埋，目的是希望市民知道有大量供應，唔好搶住買樓，但市民又點會聽政府講，一於少理，潛在供應量並沒有發揮政府希望作用，樓價仍然飊升。
到了今日，政府仍然講潛在供應量，令到市民以為未來供應太多，樓價一定會下跌，其實，潛在供應量是在地產商手裡，樓宇唔好賣，地產商就唔會起樓，潛在供應量就會潛水，老實說，報道潛在供應量真的是沒有意思，倒不如報道貨尾單位，今年第一季貨尾單位有二萬個，比去年第四季少了兩千個，連貨尾都咁好賣，又點可以話樓市差。
