什麼人會買美債

　　昨日中午，一個人屋苑會所睇雜誌，有住客話有一個問題，美債息點解咁高，10年息超4%，30年近5%，理論上美債是最安全的，既然安全，債息點解咁高，所以，大家一定認為美債不甚安全，如果唔安全，什麼人會買美債。

　　我話情況好似一間有自置物業酒樓，雖然生意唔好，每月都蝕錢，但物業值錢，酒樓於是發行一些禮券，首批買家大多數是物料供應商，經年累月賺了酒樓咁多錢，買返一些禮券都是應該，就好似買美債國家，都是因為賺了美國佬咁多錢，唔買唔得，而且酒樓是自置物業，就算酒樓執笠，就要賣走自置物業來找數，就算要輸，都唔會輸好多錢。

　　現在物料供應商覺得酒樓危險，不但收緊賒數，而且唔繼續買酒樓禮券，甚至會將禮券打折賣走，美債也是一樣，除了日本，大多數國家都減持美債，到了那個時候，就輪到酒樓的股東買禮券，而美國的公司就會買美債，所以，現在美債仍然有市場，不過，這只是治標不治本，如果美國唔開源節流，長年累月的赤字預算，美債不斷上升，最終會壓跨美國。