內地人買樓，早已糧草先行

　　撤辣之後新樓盤銷售，買家大多數是內地人，如果唔信，大可以去各新樓盤售樓處聽下，大多數買家都是講普通話，不過，買樓的人雖然是內地人較多，但銷售額則各佔一半，因為內地人只買一個單位，買兩個的都很少，但買樓的香港人很多都是西餅客，一打一打咁買，老實說，話哂都忍咗咁耐，現在買多啲都無可厚非。

　　有人話，一般國內人唔係咁容易轉錢來香港，現在買樓，會不會最後成交唔到要撻訂，那些人可能唔知道，內地人並不是今時今日才打算在香港買樓，而是已經準備了幾年，不過，政府要收取30%辣招印花稅，而且樓價又咁高，當然唔會買，不過，這並不會打消內地人買樓雄心，早已糧草先行，他們以螞蟻搬竇方法將資金轉到香港，打算香港撤辣後才買，唔經唔覺已經幾年，打算買樓的內地人早已儲到一大筆現金，所以，現在買樓是絕無資金困難，擔心他們沒有足夠資金只是過份憂慮而已。

　　今次真係遲買好過早買，如果他們在兩三年之前買樓，不但樓價比現在最少高20%，仲要俾30%印花稅，仲有，由於他們早已資金轉到香港，碰啱人民幣貶值，雖然幅度唔係咁大，但亦慳到5-8%，加埋加埋，內地人現在買樓，比三四年前慳了大約60%，真係唔買就笨，當一般香港人了解到這個情況而急起直追，可能要俾錢人賺買摸貨，真係諗極都唔明，點解土生土長的香港人在買樓方面輸比遠道而來的內地人。