「阿媽，我返來啦。」

「咁晏，去左邊度呀？」

「我有個好消息話比你知：我買左樓啦，唔使再驚樓價係咁升上唔到車啦！」

「吓？阿仔，你唔好嚇阿媽喎，拿，咁大個人，唔好同我開呢D玩笑！」

「唔係講笑呀，真係買左樓啦，我今日同阿怡好好彩抽中荃灣環宇海灣，你知唔知人地係新盤收票王，超購廿倍，咁都抽到，真係好彩！」

「吓？阿仔你無睇報紙咩？X果話呢個墳景公路盤質素好差喎，又話唔平，你做乜咁蠢比人氹左落叠？」

「唔係呢，佢平過萬景峯同御凱，又近西鐵站......係，個地產代理落足嘴頭氹我地，但係我同阿怡好認真計過數，首期同埋供款都OK，仲過到壓力測試，無問題架！」

「阿仔，你唔信我，都信下D專家呀！人地國際貨幣乜乜組織都話全球樓市都有風險，又有咁多世界性報告話而家香港樓市同收入比較全球最高......唔信鬼佬，都信本地薑呀：人地大炒家「白旋風」陳清白話而家樓市係超級泡沫，政府鬼咁多辣招、又大增供應，炒家離晒場，樓價一早見晒頂啦！你好學唔學，而家先來學人買樓，你係咪想激死阿媽搵山拜！」

「阿媽，真係無問題架，我已經比左廿幾萬訂金啦，你唔係叫我大拿拿廿幾萬訂金都撻訂呱？」

「廿幾萬好多咩？由細到大阿媽比左唔止廿幾萬栽培你啦，我有無同你計？你知唔知樓市崩潰起來唔係人咁品架，97年你仲細，感受唔深唔怪你，你知唔知我老友個老公當年就係因為樓市突然崩潰，被銀行追差價，搞到跳左樓呀！」

「我知我知，呢單野你講過好多次啦，不過咁喎，而家D地產商老細成日話建築成本四千幾蚊呎，加埋地價，又要利潤，點跌呀！」

「地產商老細緊係咁講架啦，氹你地落叠咋......講多無謂，老豆，你話點算？」

老豆是個毫無主見的人，見老婆發晒脾氣，又想起老婆老友個老公當年的悲劇，道：「阿仔，你當孝順下父母，聽下老人家話，今次撻訂係肉痛，但係錢可以再搵返，唔使第時變負資產......我地得你一粒仔，唔想你做傻事啫！」

阿仔很不情願，但老豆老母強烈反對，內心掙扎了很久------之後，無奈地同女友講述要撻訂的決定。

上述故事，可能是過去一年新盤市場總共150宗撻訂個案的其一例子，發展商沒收訂金(俗稱殺訂)達一億元，即使最近市場焦點、超額認購極多倍的荃灣環宇海灣也錄得4宗成交金額介乎五百餘萬至一千一百萬之間的撻訂個案，撻訂金額由約25萬至55萬不等。

兩口子置業，最忌太多人比意見，除了叫你小心之外，又話要聽所謂專家勸告、仲加鹽加醋恐嚇你------老實說，間樓係你、首期係你、供樓係你、住的又係你，計得掂數的話，樓市升跌與他人何干？搞到要撻訂，多麼不值得。

一言蔽之：置業計數最重要，莫因勸阻而撻訂。