斯諾登嚟香港爆大鑊，揭發美國情報部門在全球（包括香港）監控網上通訊，Big Brother無孔不入，任意侵犯私隱，立即掀起超級風暴，香港成為舉世注目嘅風眼。政圈老友發現一個引人遐想嘅奇怪現象，就係公民黨一直態度曖昧，左扭右扭迴避直斥美國當局，好耐人尋味。

老友指，公民黨向來高舉人權旗幟，凡有維權事件，都撲出嚟高聲疾呼，大力鞭撻，從來唔執輸，但今次斯諾登披露國安局秘密行動，擺明漠視人權，但該黨至今未企出嚟直斥其非，而上周六人權組織操去美國駐港總領事館抗議，該黨一眾阿哥阿姐亦冇現身，只有小貓三兩黨員參與，比起過往某些大遊行高調亮相，有天淵之別。

有市民遊行到美國總領事館抗議美國當局秘密監聽，侵犯人權，但公民黨態度曖昧，耐人尋味，民主黨亦未強烈聲討，佢哋顧忌乜嘢，引人遐想。

早兩日記者去立法會追問黨魁梁家傑點睇單嘢，佢只冷淡回應，全程避重就輕，話美國政府可能於日內提出引渡要求，呢段時間「立法會冇乜嘢好跟進」，只能等法庭處理。問及香港應否追究電腦被入侵事件，佢就將問題卸開，話斯諾登嘅人身安全都成問題，立法會有乜條件叫佢交代港人嘅私隱有冇被入侵？

毛孟靜早前同范國威一齊去信奧巴馬，要求寬待斯諾登，呢位阿姐雖然係公民黨核心，但呢次行動同該黨冇關，而且封信並非譴責美國政府，只係為斯諾登求情，取態極之溫和，矛頭冇直插國安局，顯然只想抽吓水，但又唔想太激。

毛孟靜寫信畀奧巴馬，要求寬待斯諾登，明顯射歪咗，取態甚溫和。

公民黨對美國當局立場含糊，泛民線人拆解指，內地半官方傳媒已出嚟砌美國佬，如果公民黨加入聲討行列，等於撐埋阿爺，搞落去變得好混淆，唔符合該黨一貫立場，所以佢哋睇定啲再算。另外，政圈已有流言指，公民黨同美國關係極好，所以今次國安局被爆大鑊後，佢哋顧忌好大，唔想直插美方。呢個講法雖冇真憑實據，但某泛民中人都認為「絕對值得思考」！

由於立場尷尬，公民黨將焦點轉去法律方面，着重於香港司法制度應保障斯諾登嘅權利，如果美國提出引渡要求，就由法庭依法律處理，但美國仍未出招，佢哋亦冇乜嘢好講。

至於民主黨，同樣打閃避球，至今仍未就事件表示強烈抗議，只由涂謹申提出引用「特權法」請斯諾登去立法會作供，但呢個意見被外界「彈」到飛起，話佢罔顧「叛諜」安全，亦太天真。

泛民兩大黨至今仍十五十六，唔知點表態，所以上周五民主派開飯盒會，大家都只傾法律問題，之後你眼望我眼，唔知可以講乜！