香港樓市之華山論劍

　　中原老細施永青最近唱好香港樓市，睇來老施嘅唱好有市場動力嘅支持。中原指數自舊年春夏交替以來，由低谷嘅 136 點穩步上升到今日嘅 154，升幅達百分之十三。老施有幾千個員工每日盯住個市，佢係香港少有嘅幾位分秒間就把握市場脈搏嘅人。神州大地有乜風吹草動，對香港有乜政策變化，佢一定比不停吹淡風嘅由喺新加坡國立大學退休後返來，香港依家喺科大任教嘅葉秀亮教授對實地即時消息靈通得多。

　　呢幾年來葉秀亮教授對香港樓市嘅負面言論頗引起市場嘅注意，以至被媒體冠以《末日博士》。早年香港股市就有 Marc Faber 呢位綽號《Dr. Doom》嘅基金經理，如果你炒黃金一定識得佢。另一位俾稱為《末日博士》係紐約大學教授 Nouriel Roubini。佢雖然講多錯多，一役預測 2008 年金融危機而名聲大噪。不過最近轉咗性，認為 AI 人工智慧會引發寒武紀式 Cambrian 嘅經濟大爆發，將會推動美國潛在嘅經濟增長率喺 2030 年前達到4%，長期來講甚至會攀升至10%。做教授嘅多數俾人喺象牙塔裡面閉門造車嘅感覺，唔使聆聽市場動脈嘅跳動，通過對數字嘅理性分析就俾出經濟或者樓市走向。葉秀亮教授認為香港樓市會從當今嘅價格仲會有跌一半嘅空間，佢主要嘅理據係中港兩地跨境交通越來越方便，因而拉近了兩者之間價格的差距。我覺得更令人悲觀的，是香港在政經制度上和大陸的快速融合，香港正迅速的變成了好像深圳一樣的城市，因此會失去一直以來房地產價格高冠全球的特殊性。據講最近香港樓市成交的三分之二以上都是來自北水南流的大單成交，看來最近的反彈力度好難持久。