唔好得罪班議員

木鐸
2012年6月27日

日前睇報紙又見到香檳大廈掃黃，以鳳樓而言，該廈真是掃得好密，幾乎個個月都有。該廈位於九龍尖沙咀金巴利道，人流如鯽，地段好靚，是旅遊核心區，近年已成發展商狙擊對象，聞說已有發展商購入兩成業權，當是落釘。所以阿木當然認為幕後黑手應該是該發展商或其打手中介。明查暗訪下，聽聞黑手真係可能不是發展商或中介。據知情人士講，香港不少整幢商廈或全層商場劏房來作鹹肉莊，供一樓一賣肉之用，一樓一不是犯法，警方可以檢控的，是那些拿雙程証來開工的鳳姐。但向來這些巡查和檢控都不多，唯香檳特別旺場，當然有內幕啦！

他細細聲告訴筆者，但凡這類大廈或某截街（企街）有賣淫或甚麼的，若然被警察清理得乾乾淨淨的應該是當地議員功勞。而香檳事件亦一樣，不過香檳事件應不僅是有議員睇不過眼該廈艷幟高張，而是當中有私人恩怨，為同袍出氣是也。話說前民主黨總幹事及九龍城區議員陳家偉去年七月被揭於香檳大廈找鳳姐訪談後，香檳大廈從此多事了。陳往找鳳姐訪談後，搞到滿城風雨，雖然話退黨，但都搞到個黨形象一落千丈，黨友自然遷怒於班鳳姐啦！

大廈巡查頻密，開工時間變得不穩定不在話下，亦影響了嫖客到訪的意慾，誰想去一個十室九空又或尋歡時間突遭拍門查身份証的場呀。越查得多，個場越死，最死係班業主，因為租客會慢慢流失。查實計阿木話，鳳姐主題大廈已落伍，且風險好大，被人查封得多的話，隨時會被釘契。租值雖然話好過做劏房，但都不是好值，香檳位置那麼理想，應該有好多方法可以提高租值，例如統一全層，申請個賓館牌，時下自由行概念仍然旺燒，所有旺點的房都爆，租值做得好理想。