地產代理之哀歌   仲達 2013年5月30日

什麼行業前景最暗淡？

客源不足？人流量不足？同行之間競爭太激烈？廣告客戶忽然大收「水喉」？High Tech 揩野？被新興的革命性產品搶佔市場份額？範式轉移？夕陽行業？

統統都不是，是被政府針對、政策打遏的行業。

俗語有云「窮不與富鬥、富不與官爭」，制定遊戲規則的人，無論如何也不能得罪，就算沒有得罪之，假如制定規則者認為市場失效，需要糾正之時，也會以「公義」之名主動進行資源的二次分配：在我們身處的世界，這個制定遊戲規則的人，就是政府。

筆者近日與不少地產代理交談，親身了解前線的苦況，部份發人深省、使人心酸的對談，僅錄如下：

「以前日日飲茶，而家食個飯盒都嫌貴，好多時捱杯麵咋。」

「好多人話而家係冰河時期，等同沙士，其實係慘過沙士呀！沙士期間業主都肯減一兩成，而家？半成都無呀！」

「你知唔知我地呢行撈得最掂係點款？金勞？錯！係你部手機成日響，一個鐘頭可以響十幾次---咁你知唔知而家我部手機響幾多次？係零！ 」

「未有雙倍印花稅都可以做投資客、收租客、工商舖生意，而家D稅咁貴，工商舖又要即時比印花稅，邊有得炒呀？最慘就係我地，業主買家各自拉鋸，互不相讓，點做呀？」

「通常帶客睇樓，睇十幾廿間都會落疊架啦。而家？個客同我講，唔睇夠五十間唔會買野，好彩最終都開到單，但係睇左七十幾間囉，我對皮鞋難左囉......」

「我地半山區件件換樓貨，就算唔使八位數字都唔係咁易負擔啦，原本已經因為印花稅隨樓價越貴而越高，所以少客，而家仲嚟個雙倍印花稅，咁即係叫我地執笠啫！」

「以前行頭有句祖訓叫『做大唔做細、做買唔做租』，貪佢『功夫差唔多、佣金高好多』。而家無呢支歌仔唱啦，有得做你就要做，有客嚟到，即使係租車位租套房，都要當佢大爺咁服侍，開到單就當佢神咁拜。」

「我地呢行最慘係乜？工時長？大把工都係啦，係無牙力罷工！老實講，每日開成十幾個鐘工，假日例牌無得抖，真係慘過做地盤工、碼頭工，但人地有工會有牙力，我地？算啦，D拍擋唔比人炒都自動走佬，我都準備轉行......唉，人到中年，錢又無，人又老，仲要轉行重頭嚟過，我地有乜錯？點解政府要咁對我地？」

可能有人認為，做地產代理「好天斬埋落雨柴」，不用替他們擔心，但香港地產代理行業的分佣，大多是公司佔大部份，員工佔少部份，據筆者了解，除了金牌經紀，大部份從業員只是僅夠糊口，頂多表面風光，日子一點也不好過，哪來餘糧應付長期挨打的局面？

去年10月，整體物業交易單月已近1.2萬宗，推出雙辣招後，氣氛轉淡，跌至今年1月的八千三百多宗，正當市場期待小陽春使市場恢復生機之時，又來了辛辣招/六辣招，包括完全趕絕投資需求的雙倍印花稅，使4月的成交量暴跌至四千三百多宗，住宅單位僅佔三千四百多宗，半年之內物業交投大跌六成！

與此同時，根據地監局的資料，今年4月份地產代理(包括大細牌)持牌人數增至40,171人，比去年增加了7%，但按該月之物業成交量計，平均九個地產代理才有一個可以開單---餓死地產代理之說，有數據支持。

一言蔽之：政策打遏無運行，打破困局要變通。