|
仲達 |
|
有「白旋風」之稱號，在物業投資界打滾超過30年的資深投資者陳清白，最近接受某著名地產報訪問時表示：
「我地呢班經歷過97的炒家，睇返今日，樓價仲高過97年，仲唔正常過97年，唯一不同是利息低，問題是低息不是永遠的，即使新特首梁振英上場唔壓樓價，個市都會跌，宜家個市高風險、低回報，就好似豆腐渣工程咁，唔企上去都會冧。」
97距今15年，以白旋風的資歷，即使在當年已有15年以上的投資經驗，今天如此悲觀，事出有因：「呢幾年好多人都叫我做淡友，只因當年真係跌得太深，傷得太重，好似我97年買左深井浪翠園3個樓花，單位千餘呎，以建築期付款，每個畀左樓價兩三成，大概(每個)300萬元左右，好彩新地畀撻訂，不過我就冇左成千萬元啦！」
「傷得我最深不是那個樓盤，而是政策再加上當時的金融風暴。樓價一跌就跌多年，無人諗到會跌7成，睇住個市一路跌，現金一路燒，「渣」住D貨完全無得守，只有棄船，棄到自己可以瞓到覺為止。」
陳又表示：「90年代，向發展商買一手樓絕對有水位，但近幾年，不少新盤均以天價開售，當經濟一逆轉就出事。今日樓價已貴過97，高樓價、低回報，根本就唔正常，我叫人一定唔好在呢個時間買，跌3成無走雞，整個樓市已去到不可思議。」
事實上，白旋風近幾年已開始睇淡，在政府推出額外印花稅，簡稱SSD，之後就更加悲觀，接受不同媒體訪問都毫不隱瞞其對樓市的悲觀預測。與喜歡「唱好出貨」的炒家不同，其誠信亦遠較股票市場的大行和末日博士高。
不過，誠信歸誠信，一個再有誠信的人，其預測也可以是錯的---尤其是香港樓市參與者眾多，牽涉層面極廣，由牛頭角順嫂到美國聯儲局主席都起到影響。
本港樓市起伏不定，連超人和四叔都不能準確預測樓市走勢，甚至可以大膽的說，即使上帝真的存在，也不會知道樓市如何發展---外圍經濟陰晴不定、歐債危機無日無之、美國經濟扶極唔起、中國經濟硬着陸風險明顯增加。
悲觀之因，亦可有否極泰來之果：正因經濟差到極點，迫使各國政府聯手救市，以形形式式的量化寬鬆措施支撐經濟，熱錢因而流進資產市場。加上市民漸對金融產品失去信心，有磚頭在手遠勝與鈔票同樣「講個信字」、但是可以短時間無限增發的股票。
港人有句民間智慧：「樓價跌極都有間樓住，但係買股票輸左，就真係渣都冇！」
雖然這句民間智慧也充滿漏洞，例如樓宇有承造按揭的話，跌到變負資產，銀行會收樓當銀主盤強行拍賣，而手持物業亦需繳付差餉地租管理費及各類維修費等等，實際持有成本不比股票低，甚至遠高於後者；有潛質的好股未來增長潛力可以遠勝物業，不過連匯豐這類大藍籌都可以由百幾蚊跌到現時六十幾蚊的田地，又真係好嚇人。
寫這篇文，不是為了警告大家樓市即將大跌，事實上白旋風的確忽略了量化寬鬆、天量貨幣對樓市的支持作用；當然，樓市升得太多，政府會出手打壓，但是要大跌三成以上，真的非常困難。
一言蔽之：樓市現價有道理，要談大跌仍尚早。