|
仲達 |
|
本來今天是寫聯匯反思(7) - 政府的抉擇，但是太過嚴肅的文章，一連看一個星期，是會有點吃不消的，這個道理顯淺得很。
難得今日星期五，個個都Holiday Mood，寫點輕鬆一些的話題吧，當作給自己和讀者鬆弛一下神經也不錯。
歐國盃，全名歐洲國家盃，其實已經不存在！
大家是否很驚訝？明明現在正在上演的盛大足球賽事就是歐洲國家盃，人人都是這樣說的，對不？
這就是人云亦云的謬誤---1960年，當第一次舉辦歐洲國家之間的足球頂級賽事之時，正確名稱是UEFA European Nations Cup，直譯中文的確是歐洲國家盃，但是自從1968年起，則改名為UEFA European Football Championship，應該譯為歐洲足球錦標賽。只是約定俗成，個個都叫佢做歐國盃，你唔咁講，硬係要講歐洲足球錦標賽，人地會當你係傻瓜。
無辦法，唯有將錯就錯，繼續叫佢做歐國盃。
歐國盃是除了世界盃之外最高水準的足球錦標賽，雖然決賽週參賽隊伍只得16隊，遠少於世界盃的32隊(順帶一提，2016年起歐國盃決賽週參賽隊伍將會增加至24隊)，但是論球隊質素，卻是隊隊明星隊隊強：歐洲之國家隊拿取世界盃次數的總數，多過所有其他洲份國家隊拿取世界盃的總和，可想而知，比賽水準之高，舉世無雙。
其實世界盃有時都不甚吸引，當一些不知名的第三世界球隊與亞洲或者大洋洲球隊比賽，真的令人懷疑有多少人會有心機觀看；另外，超級球星如美斯，踢巴塞就天下無敵，踢國家隊就有心無力，搞到2010年世界盃八強慘吞德國隊四蛋，你話幾陰公......最糟糕的是阿根廷明明粒粒皆星，除左美斯仲有希古恩、阿古路、拿維斯、泰維斯等等，南美人天生就識踢波，竟然踢出個衰樣，真係愧對江東父老。
諗諗下，其實足球國家隊都好反映到一個民族的特性：德國人嚴守紀律、團隊精神滿分，自然在踢波呢類好需要合作的運動有優勢，所以奪取了歐國盃三屆冠軍仲有三屆亞軍真係實至名歸。西班牙與意大利等拉丁民族浪漫至上、享樂人生，好注重個人技術、控球扭波甚至射術都好出眾，衰在成日獨食，被人睇穿「嘜實」就無運行啦。不過西班牙隊而家幾乎等於巴塞隆拿，踢慣踢熟自然強好多，雖然今屆歐國盃第一場竟然被意大利先開紀錄，真係嚇到班粉絲心血少D都唔得。
至於前宗主國英格蘭，真係令全港最多人又愛又恨的隊伍，一來管治過香港155年，為香港帶來西方的自由、民主(雖然好少)、反貪、基建及經濟制度，使我們今天仍然以身為中國之中最文明開放的城市而自豪......說遠了，總之有濃厚感情，但是英格蘭的表現飄忽，時好時壞，最唔似英國人給世人的印象：冷靜、世故、理性，真係好令人痛心。唔講你唔知，原來英格蘭至今仍未奪得任何一次歐國盃冠軍，仲竟然在過去十三屆歐國盃之中有五次未能晉級決賽週！(另加第一屆無參賽)，而且係好近期的2008年都仲係咁，你話令人幾激氣！
唔知大家今屆支持邊隊呢？雖然西班牙好強、好有冠軍相，但係我都係鍾意較理性同穩定的德國隊多D。
一言蔽之：足球講求合作性，民族性格定高低。