茶餐廳日誌（324）如果以投資者角度來看樓市，現在是不值得入市

久未留言，最近留意到一個趨勢，全世界開始有默契地合唱：唱跌。

好似所有災難都將在今年、下年出現。

相當熟悉嘅氣味，同樣經歷在三年前嘅5月。被操控嘅傳媒，開始突然轉向，鋪天蓋地反映壞消息。

搞到我呢個立志做收租佬嘅耕田佬相當興奮，什至有d動搖，蠢蠢欲動。手上3塊磚就快過3年禁售期，心思思想丟兩塊。地產A老友拍心口話如果肯低市價3-5%，3日內即刻簽約，包賣。

多口問一問老叔父意見，點知俾佢省到暈。結尾一句係：買咗就好好過日子，安心做人，做嘢最忌半途而廢。識跳上跳落係叻仔，但多數會跌親，君不見股市專收叻仔？

我抗辯：投資者角度吖嘛！

結果差d被一個酒樽扑落來。

叔父大鬧：你老豆當日就係貪圖眼前嘅反謂暴利，所以賣田賣地，大大聲話日後跌咗再賣返，結果呢？d錢咪跌左囉！過去10年有幾十萬你呢d儍high！

我即刻笠水唔講，但心底計數，來回手續費三成，但保守估計會跌5成，樂觀d會跌7成，所以靜靜雞打電話俾地產A，話我預備好利是，叫佢發散手足金睛火眼𥄫實，呢排唱淡d專家嘅動向，睇下佢地點樣沽一間買3間，沽一幢入3幢。

邊有理由唔跌呢？衆志成城，麻煩大家一起嗌，一定跌⋯⋯ 七成！七成！七成！

哈哈，刀兄別來無恙！

小弟真係吹大咗，邊有3塊磚吖，得3塊瓦片仔，啱啱夠遮頭咋。刀兄攞來養貓狗都幾十萬呎地，邊有得同刀兄比吖。刀兄見諒，都怪小弟夜郎自大，有怪勿怪！

不過都係要怨刀兄，3年前日日夜夜出來嚇鬼，話賭乜Q118，又什麼再下一浪97，搞到當時小弟驚到手騰腳震，入市時慌慌張張，走咗去買大，如果走去買細，你話幾好呢？依家諗返起，真係「多得你唔少」！哈哈！嗰陣時如果肯聽你老哥點，而家⋯⋯，唉，總之⋯⋯ 總之⋯⋯命也！

刀兄轉型去大灣區洗底後，小弟又冇跟，錯失發財大浪，唉，總之⋯⋯總之⋯⋯ 就係悔恨啦！今見刀兄又日夜論壇出動，賣力依舊，天道酬勤，刀兄加油呀！共勉之，共勉之！

答刀兄第2個問題：

如果刀兄你明，咁刀兄已經係波叔或者菜生李生啦，明冇？(絕對冇得罪之意，實乃係真心話。）

不過阿刀兄，撈到個大灣區波叔都唔錯啦，我真係信你喺大灣有幾十萬呎養緊貓狗㗎！(呢句都係真心話)。)

自住樓都沽埋佢？

刀兄真係睇得咁灰？小弟最盡都只係諗住放一間出來，然後攞來full pay剩低兩間，學東尼嘅零成本操作咋，然點知俾老叔父省咗鑊甘！

老叔父話唔趁低息借錢幾時借錢？我話來緊息口將會升，佢就叫我走出去呢個世界望吓比較吓之後先講，唉！

刀兄真係睇得咁灰？真係咁灰？你知我一直都信你㗎，咁呢浪跌幾多？七成？