地產博客
瀏覽人次:26007    回應:3
文亮語

新樓愈好賣,樓市愈健康

 

湯文亮博士

紀惠集團行政總裁
2018年3月14日

  今次會德豐真威水,在立法會補選日開賣,竟然賣過滿堂紅,750個單位兩次掃清,買家似乎意猶未盡,有老行專話,以現時樓市熾熱程度,多2,000個單位一樣可以掃清,今次我又預測錯誤,我認為今年不會出現小陽春,但以今次會德豐新樓銷售來看,只要多兩三個新樓盤賣過滿堂紅,想唔承認是小陽春都唔得。

  預測錯誤是很小事,我甚至已經習慣,但千祈唔好以為我希望新樓銷情不佳,如果任何人有這種想法其實是誤會,我極之希望新樓銷情理想,而事實上愈多人買新樓,樓市愈健康,因為現在買了新樓的人,有部份應該要放售他們的自住單位,雖然地產商提供高成數按揭,但始終都是要供樓,老實說,供兩層樓是很吃力,即使其中一層可以出租,但始終都是幫補一下,比較穩陣的人會出售現有的自住單位,或者他們有多少是被迫,因為不能夠出售新買的單位,理由是要付SSD。

  在去年,樓價雖然升了14%,但銷售量並沒有跟隨樓價上升而上升,去年有16,000個新樓單位入伙,但有5,000個仍未售出,這個數字顯示去年樓價多少呈現乾升狀態,亦說明購買力並不足夠,如果購買力充足,地產商又點解唔賣樓,結果是只得11,000個新樓單位入伙,間接令到二手樓的供應量亦不足夠,沒有足夠供應量,樓價又怎會不上升,如果今年可以有20,000個售出新樓單位入伙,實則供應量比去年差不多上升一倍,影響所及,二手樓亦會增加供應,如果樓價繼續上升,這個數字不但是結實的,而且可以證明樓市是健康,現在唯一擔心的就是地產商見銷情理想,他們反而持貨不賣,希望可以獲得更多利潤,如果地產商採取這種態度,就算政府怎樣增加供應都解決不了供應不足這個老問題,不如考慮用其他方法令到地產商趁好市賣樓,方法有很多,只是欠政府是否夠膽實行。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

回應者名稱
密碼
1. 腥港人 2018-03-14 09:32:28
只要係個人持有嘅第二個單位,或者係公司持有而無租出嘅單位,一律加收差餉,到時即使唔賣,都一定要搵人租左佢,租金唔升就平抑到樓價。反正政府都唔想樓跌,寧願靠通漲慢慢追樓價,樓價橫行已經可以收工
2. 真真薯片 2018-03-14 09:53:17
在下一直緊持地霸囤貨論, 依家繼續重複講, 以malibu為例, 堅叔2014年用20億補地價拿到塊地, 起樓頂佢40億, 成個項目成本約70億, 佢賣兩日樓賣左唔夠一半單位已經變現64億, 接近完全收回成本, 之後既貨尾大可以配合正苦免差響政策無限囤貨, 學浪澄灣咁每年見市好先拎百零二百個出黎賣, 呢招少股票叫做放風箏, 先沽出部份貨收回成本, 剩底既零成本貨就長期持貨由佢飛到幾高就幾高, 讓盈利奔跑

同股票唔同既係, 港樓供應短缺, 供應有壟斷性, 市場缺乏有力既競爭者(居屋), 買家一係唔買, 要買既話基本上無得揀, 所以地霸囤貨可以自我實現貨尾升值, 股票除非你係莊家否則都冇得咁玩

在下一直以黎既預言, 現樓貨尾數量會大升, 周街都係浪澄灣, 呢個預言正在一步一步咁實現

3. 香港土著 2018-03-14 10:56:19
恆隆所謂惜售, 最高峰都只係揸住君臨、浪澄、碧海幾千間, 其間完全沒有補充土儲, 收租維持生計, 間中賣樓食餐好野.

當下地產商盤數有冇咁高防守力呢?購買力是否可以支持樓價大升呢?拭目而待......