地產博客
瀏覽人次:21294    回應:33
文亮言
新樓賣得太好其實是死罪
 
湯文亮博士
紀惠集團行政總裁
2019年1月11日

  有老友話點解物業代理咁傻,明知道地產商是衣食父母都會得罪,究竟整件事誰是誰非,1.7%佣金是否太低,我相信老友的問題代表了不少人的疑問,我認為在整件事之中,沒有人是,亦沒有人非,地產商與物業代理的反應都極之正常,地產商認為,如果不是開價太低,又怎能夠在一Q清枱之後,繼續多兩次一Q清枱,1.7%佣金實在是太高,應該0.5%便足夠,物業代理則認為,他們動用了龐大人力資源,4萬個物業代理最少有3萬個做緊那個新樓盤,1.7%實在是不足夠,就算2.5%都是太少,整件事雖然沒有人是,亦沒有人非,最錯的就是那個新樓盤賣得太好。

  我曾經撰文話,沒有老闆喜歡一Q清枱,甚至是死罪一條,如果不是開價太低,又怎可以一Q清枱,今次裕民坊新樓盤連續幾次一Q清枱,地產商又怎會想到這是物業代理催谷的成果,只會想到是開價太低,甚至不用物業代理,仍然可以一Q清枱,其實,今次新樓盤成功,除了物業代理催谷之外,天時亦非常緊要,在過去幾個月,香港沒有大型新樓盤推出,積聚了不少購買力,而新樓盤所佔地理位置優越,有齊晒天時地利人和,才可以賣到一個好成績,三者缺其一也不可以,所以,2.5%佣金其實不算高,地產商可以想想,倘若新樓盤銷售成績不理想,他是否要加佣加獎金來促銷,今次地產商所付的佣金其實比預期為少,而事實上今次物業代理搵自己老襯,只要他們放軟手腳,入票率不足,地產商就會主動加碼,希望代理們努力去做促銷,大家又可以睇屯門的新樓盤,開價比同區二手樓還要平兩成,但收票成績絕不理想,如果物業代理話有5%佣金,保證一Q清枱,你估地產商會不會話佣金太高,所以話,今次裕民坊新樓盤,物業代理與地產商誤會,應該全部是物業代理責任,因為他們賣樓賣得太好。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

回應者名稱
密碼
1. 舍神 2019-01-11 09:43:54
如果真的可以係自己放軟手腳下賺得更多........... 叻仔啊!
2. 腥港人 2019-01-11 10:05:45
攞東九龍市中心新樓同屯門山旮旯新樓比,根本無得比。
後者先天不足,平都未必人人啱住,東九龍有附近工商區返工客、區內二代分支家庭,但屯門黃金海岸、掃管芴都唔具備,催谷都唔見得催到幾多,平又唔夠平,方便更加完全唔掂。
3. 真真薯片 2019-01-11 10:50:22
同樣劈價,觀塘搶爆,屯門拍烏蠅,可以證明市好時雞太皆升,市差時先睇到質素上既差距,最慘係市好時創新高搶劣質盤果班,隨時一鎖就十年八年,AA最緊要有佣收,收完佣就你死你事
4. Herbert Chang 2019-01-11 11:01:26
地產商因今次開價比前段時間可開的價低了,所以付低的佣金。叫做想有難同當。但應早清楚說明簽約。
代理冇定好服務佣金便開工,更自主決定回佣給客,是代理自己的決定。
兩者都有錯。
5. 自我陶醉 2019-01-11 11:47:21
Herbert兄講得對,夠中肯。
6. 真真薯片 2019-01-11 12:13:55
話明係佣金,當然係賣得越貴,比得越多,地霸覺得有乜理由賺一倍又係2.5%,賺7成又係2.5%?減左價,易賣左,佣金調低非常合理

AA角度睇,無論難賣定易賣,係唔係都去到盡餓狗搶屎,AA又冇份訂價,平定貴,易賣定難賣,投入既成本同人力都係100%,有乜理由收少d?

不過呢個世界只有強弱,沒有對錯,大家都覺得自己正確,結果係誰大誰惡誰正確,公開信立即收回,改口話老闆有少少要求好合理,成件事由頭到尾都係地霸正確,因為地霸係老闆
7. 因為地霸係老闆 2019-01-11 12:28:18
我警告你唔好再警告我啦吓
8. 貴公子 2019-01-11 12:39:05
樓花期2年半,好難講話賣得平,因為之前新盤賣得貴,係無中美貿戰,加息等不明朗因素。
9. 十一哥 2019-01-11 12:50:21
地代喺天價時先有價值、價高~傭高唔係AA袋哂、經AA回傭比買家當折扣、合法又風光、有乜古惑抝撓入哂AA數、大錢袋唔會沾到蘇州屎、而家衹係大錢袋乃念AA以前幫開手、明醒AA吊命、乜價位賣唔賣得~大袋會唔識計數 ? 玩網上抽簽分分鍾仲爆、滴水唔比AA都仲得啦!

10. Herbert Chang 2019-01-11 13:13:50
以佣金為收入的行業,在今天的社會進展是一個面向日落的行業。
電腦和網絡科技遲早可以改變或取代這行業。
做好本份,要有建設,有貢獻
11. 真真薯片 2019-01-11 14:04:28
10樓,呢個社會衡量一個人同行業既價值,取決於呢個人或行業從社會攞到幾多,而唔係睇呢個人或行業付出貢獻幾多

修橋補路冇屍骸,貢獻者得個做字,貢獻完青春後,老左乜都冇自生自滅,既得利益者坐係度就財源滾滾,有名有利有地位有女人,萬人景仰,安享晚年,雖然悲哀,但現實就係咁
12. 付出貢獻幾多 2019-01-11 14:36:23
睇吓老闆想晏啲指數升幾多,就升番 1.7 啦
13. 目標意向佣價 2019-01-11 16:27:42
九龍  2.3%-2.42%


14. 望東樓 2019-01-11 17:04:30
查實AA肯接受嘅最終佣金係 = (發展商回佣 - 地代俾買家嘅回贈)。

而地代俾買家嘅回贈亦可以演繹成地產商托價成數。
15. AA肯接受嘅最終佣金係 2019-01-11 17:44:01
原來係 -0.3%
16. 結構性牛市 2019-01-11 19:11:43
加息週期結束,減息週期快開始。政府把公私比例從64變成73,未來十年本來已經不多的私樓供應再進一步減少。加大綠置居供應的結果只是令排公屋條龍更長。

本港的存款從1997的4萬億加到現在的14萬億。

香港樓價2019年下半年開始發力再升的機會好大。2020年應該可以升越188點。
17. 鳥5 2019-01-11 20:12:52
14/F,香港而家D錢,好多係外國泊入黎㗎。。。5係香港人揾好多咁储番黎呀! 美金而家走呀! 瞓醒未呀
18. 鳥5 2019-01-11 20:14:30
係16樓唔係14樓唔好意思
19. 鳥5 2019-01-11 20:33:09
16/F咁發展商就唔使劈價劈用買啦.... 我賺夠啦畀你賺啦 呢啲嘢你都好信
20. 鳥5 2019-01-11 20:48:15
綠置居嘅原意 係由 時間性租約 轉移至永久居住權 你諗一諗吖16樓發生咩事....... 簡單啲講 第一食物鏈至二手市場 由以前嘅時間大幅提升延長 最終去到 發展商嘅新樓 咪長咗好多囉 一條細魚變做中魚再變條大魚時間咪多咗十年囉 傻佬 仲未知政府玩乜
21. 鳥5 2019-01-11 20:50:20
呢個綠置居計劃係麥理浩嘅 居者置其屋強化版重量不重質...當年英國佬 對付地主就係用呢招.. 當年都係搬龍門架咋
22. 鳥5 2019-01-11 20:52:01
16樓爆咗煲㗎啦 不過今次係慢啲 底部比例一樣, 林鄭玩嘅係大概無雞糊接發展商 嘅大量爆棚 明唔明呀
23. 鳥5 2019-01-11 20:54:01
更正大規模雞糊,拆發展商 慢出大量爆棚湖。。。
24. 新樓越賣越好 2019-01-11 21:02:49
林鄭大幅減少私樓供應。90年代每年私樓供平均有三萬間以上,現在人口多了咁多,未來十年每年只得一萬四千間供應。

私樓樓價可以跌得去邊?
25. 真真薯片 2019-01-11 21:06:35
綠置居原意係慳錢,公屋超平租包晒差響管理費地租維修,蝕死人,所以賣比你,乜都唔包仲有錢收,有咩好過綠置居?
26. 鳥5 2019-01-11 21:36:43
真真兄,入左去住, 起碼 你可以選擇生仔先 或者係儲錢 買私樓。。。 最基本 人嘅需要先, 個個儲首期儲200萬先上車 50歲生條春咩!
27. 鳥5 2019-01-11 22:13:25
政府唔會輸呢個先係其中一個我信係會行得到嘅原因 如果政府話畀你聽要補貼嘅綠置居 大家等下咁咪即係話畀你聽根本唔會做囉調番轉諗係唔係
28. 鳥5 2019-01-11 22:15:22
不過今年下半年會知結果 睇下 發展商嘅部署 就會見到端倪
29. 鳥5 2019-01-11 22:20:21
如果下半年 發展商小鬧政府 , 表面扮冇事 只係搵下手搞嘢 又係咁劈價去貨 咁就林鄭應該係 贏 諗啱嘢。。。
30. 結構性牛市 2019-01-12 01:32:04
回鳥5,香港樓價從60年代幾十元一尺賣到現在幾萬元一尺,你居然話發展商一直都在劈價?你瞓醒未?

不肯填海,郊野公園一尺也不能少,發展商不發展農地,地盤模板工三千元一工都請不到人,輸入外勞加快起樓?哈哈,大把政客同你死過。

香港樓價只升不跌,是香港人的集體選擇,認命吧。

鳥5,不如同政府想下明年出怎樣的新辣招吧。
31. 唱得太淡其實是死罪 2019-01-12 09:39:26
其實唱淡初期是好意,但越唱越淡連自己都欺騙埋,那就是一個死罪,因為令到很多沒有個人思考能力的人,真的以為是真的會很淡,原本可以上車的,都因此卻步,實在是比1Q清袋的死罪更嚴重。

註:是真心勸喻可上車的人
32. 龍虎豹 2019-01-12 19:47:36
31樓,蠢先係死罪,買樓係一生重大决定,將自己幸福斷送在網上不用負責的言論上,唯有怪自己蠢。
33. 同意31樓 2019-01-12 20:01:10
2007/2008年明明是上車的好時機,當時新界及九龍上車盤才一百幾及二百幾萬。結果全城專家唱淡,話百年一遇海笑(笑死人個笑),買樓不妨等多幾年,跌穿埋沙士價後才考慮買樓。結果哩。