生存之道，圍而不爭

　　有老友見我寫文，演講都夠膽論樓市，又唔肯轉軚，但不會參加擂台陣，與老友聚會講樓市時又不表達意見，問我是什麼原因，其實，現在講樓市，如果沒有多少份量，就千祈唔好唱淡，否則就會俾人圍攻，我不是蠢人，如果現在與睇好樓市的人爭辯，事實與數據都輸給他們，最好就是避開那些擂台，即使老友聚會，別人鍾意點講就點講，圍而不爭，此為生存之道。

　　老友話未聽過圍而不爭，我話只不過是引用老子在道德經的說話，老子在道德經的結尾時寫下「聖人之道，為而不爭」，我現在亦是這樣做，只寫文章，演講來道出現在樓市危險性，唔想同其他人爭辯，好彩我睇書最鍾意睇頭睇尾，否則，都唔會睇到老子的金石良言。

　　其實，樓市是沒有隱憂，因為一切負面因素都很明顯，睇好樓市的人認為即使加息，都唔加得幾多，並且只會在今明兩年加息，而事實上如果講到加息，耶倫都唔夠膽同自己賭只是在今明兩年加息。

　　他們又認為，即使政府做到未來三至四年有96,000個單位供應，但地產商有持貨能力，見到樓價唔好可以唔賣樓，其實，如果政府學星架坡，地產商就會改變態度，他們的確有持貨能力，但並不可靠。

　　如果話經濟轉壞，更加沒有人認同，他們會認為國泰炒600人只不過是個別事件，其實，除了國泰之外，有很多公司都輸了累積期權，大量裁員不時會出現，而且被裁的大多數是中高層，是持有物業的人，他們被裁是不會影響失業人數，但會影響那些人的收入，或者要被迫放棄持有物業，不過，這一切一切都是未來會發生的事，或者唔會發生，唔似得數據咁實在，又有指數支持，現在是冇得拗，最好方法就是唔拗，所以我話圍而不爭是生存之道，我老婆睇完這篇文章之後話唔知我講乜，叫我睇下「前出師表」最後一句，原來是「不知所云」。